Portada Multimedia
Multimedia
UHintifada 336: Fayez Badawi (FPLP): «Soilik batasunaren eta erresistentziaren bidez lortuko dugu dure eskubideak eskuratzea» PDF Inprimatu Email
UHintifada
2019/01/14

FayezBadira aste batzuk Fayez Badawi, PFLP alderdiak Europarako duen bozeramalea, Euskal Herrian bisitan izan zela; eta orduan harekiko izan genuen solasaldia aste honetan eskaini dizuegu Uhintifadako mikrofonootan. Badawi Tal Az-Zatar errefuxiatuen kanpamenduan jaio zen, Beiruteko ekialdean. Gerora kanpamendu hori 1976an birrindu zuten. 1982an Ariel Sharonek Chatilako errefuxiatuen kanpamenduan burutu zuen sarraskiaren lekuko zuzena izan zen. Ibilbide pertsonal hori lagun, oso gazterik, PFLP alderdian militatzen hasi zen.
Bere jardunean Palestinako ezker iraultzailearen alderdi nagusiaren ibilbide historikoaz aritu zaigu, eta gogoan izan ditu Israelgo kartzeletan dauden erakundeko burkideak; besteak beste; Idazkari Nagusia, Ahmed Saadat; eta Khalida Jarrar diputatua. Palestinako Aginte Nazionalaren papera kritikatu du eta ukatu egin dio herri palestinarra ordezkatzeko zilegitasun demokratikoa. Salatu du, halaber, PANren okupatzaileekiko kolaborazioa. Aldarrikatu du populazio errefuxiatuak jaioterrira bueltatzeko duen eskubidea, eta batasuna eta erresistentzia; horiexek baitira, haren esanetan, euren eskubideak eskuratzeko bidea. Balioetsi egin du BDZ kanpainia Palestinako erresistentziarako lagungarria dela; eta adierazi du bere erakundeak bat egin duela "Itzulerako Martxa" izeneko kanpainiarekin. Bestetik, salatu du Israelek Ekialde Hurbil osoan duen eskuartzea, eta nola jokatzen duen inperialismoak eskualde horretan dituen interesak bermatzeko.

 
UHintifada 335: Isidre Pallás: «PANk ez dauka inongo zilegitasun demokratikorik, elkartasun mugimenduarentzat Palestinako herriaren ordezkaritza herriak berak izan behar du, eta haren gizarte mugimenduak» PDF Inprimatu Email
UHintifada
2018/12/24

palcat
Aste honetako atalean Isidre Pallás izan dugu solaskide Uhintifadako mikrofonootan. Pallás Kataluniako BDZ mugimenduko kidea da, eta Uhintifadako kolaboratzailea; eta duela aste batzuk artikulu polemiko samarra argitaratu zuen El Punt Avui egunkarian, zeinean espainiar estatuan Palestinak duen ordezkaritza diplomatikoaren kritika zorrotza egin zuen. Guk kritika horretan sakondu nahi izan dugu. Bere jardunean gure solaskideak salatu du PAN Osloko akordioetako emaitza dela, eta 25 urte geroago akordio horiek erakutsi dutela tranpa bat izan zirela herri palestinarrarentzat. Azaldu du, halaber, PANeko agintean dauden elite familiarrak, nazioarteko komunitateak onartutako ordezkaritza instituzionala badira ere, Israelek boikoteatutako hauteskunde prozesu ustel baten ondorioz iritsi direla haien postuetara, eta Israelek berak kokatu dituela agintean haien administraziopeko eremuetan okupazioa kudeatu dezaten. Era berean, kritikatu du Palestinako enbaxadak, PANk Espainian duen ordezkaritza instituzionalak, Espainiako Atzerriko Ministerioko dirulaguntza jasotzen duela, eta haren interesei men egiten duela, eta horrexegatik agertu dela behin eta berriz Kataluniako erabakitzeko eskubidearen aurka bere adierazpenetan. Bestetik, Palestinako enbaxada eta Kataluniako komunitate palestinarraren arteko gatazka horretan kokatzen du Pallásek Ahed Tamimi ekintzaile palestinarrak Kataluniara egin behar zuen bisita bertan behera geratu izana, embaxadaren presioak tarteko.

 
UHintifada 334: Laura Ciudad: «Palestinan gizarte ekintzaileek aurre egin behar izaten diote, ez bakarrik okupazio indarren jazarpenari, baita PANk burutzen duenari ere» PDF Inprimatu Email
UHintifada
2018/12/17

AtxiAste honetako atalean Laura Ciudad kazetaria izan dugu solaskide Uhintifadako mikrofonootan, Ramallahtik. Ciudad aspaldiko kolaboratzailea da Hala Bedi irratian, eta urteetan bizi eta lan egin du Palestinan; besteak beste; Radio Muqawaman, Informazio Alternatiborako Zentroak Jerusalemetik ekoizten zuen irratsaioan. Gaur egun Palestinara bueltatu da NOVACT erakundean lan egitera. GKE horrek babes legala eta laguntza ematen die Israelgo administrazio okupatzailearen jazarpena pairatzen duten gizarte ekintzaile palestinarrei. Bere jardunean salatu du Palestinako giza eskubideen aldeko ekintzaileek, erakunde politikoetako kideek, manifestariek edota kazetariek jazarpena pairatzen dutela, ez bakarrik Israelgo erregimenaren partetik, baita PANren partetik ere; izan ere; PANk okupazio administrazioarekin kolaboratzen du disidantzia politikoa jazartzeko. Halaber, salatu du afera politikoengatik atxilotutako palestinarrek auzitegi militar israeldarrei egin behar izaten dietela aurre, eta bertan ez daukatela inolako berme juridikorik.

 
UHintifada 333: Julio Perez: «Borreroa eta erasotua dauden egoera argi batean objetibotasun ariketa bat egin dugu, fokoa biktimen gainean jarriz; horrek eragin du zuzenean zentsura gaitzatela» PDF Inprimatu Email
UHintifada
2018/12/10

Gaza barbarieAste honetako atalean "Gaza. Una mirada a los ojos de la barbarie" pelikula aurkeztu dizuegu, Julian Perez egileetako baten eskutik. Laburmetraia Gazako zerrendan filmatu zuten, 2014an, Israelgo okupazio erregimenak "Babes Hesia" izeneko operazio militarrean 2000 lagunetik gora erail zutuenetik egun batzuetara. Lan honen bidez, zuzendariek Gazako gorabeheren testigantza eman nahi zuten, erasoaren ondorengo egunetan hedabide gehienek gatazkaren berri emateari utzi ziotenean, eta erabaki zuten biktimek eurek konta zitzatzela euren egunerokotasuneko bizipenak. Palestinako herriak pairatzen duen egoeraren salaketa moduan hasi zena berehala bilakatu zen ikararen kontakizun intimoa, gordina, zentsurarik gabea, populazio zibilaren gaineko ondorioak islatzen duena. Filma Goya sarietarako aurrez hautatu dute, dokumental onenarentzako sariaren atalean. Bere jardunean Perezek salatu ditu euren lana gizarteratzeko jarri dizkieten zailtasunak, Israelen aldeko presio taldeek ezarritako zentsura dela medio. Halaber, azaldu du borreroa eta erasotua dauden egoera argi baten aurrean, objetibotasun ariketa bat egitea erabaki dutela, ekidistantzia alde batera utziz eta fokoa sarraskiaren biktimen gainean jarriz.

 
UHintifada 332: «Israelek, baliabide militarrez gain, bestelako tresnak erabiltzen ditu palestinarrak Jerusalemetik desagertarazteko; besteak beste; administrazio-trabak, azpiegiturak edota hezkuntza curriculuma» PDF Inprimatu Email
UHintifada
2018/12/03

PalestinaAste honetako atalean Bilboko BDZ taldeko lagunek hilero eskaintzen diguten kolaborazioa izan dugu entzungai Uhintifadako mikrofonootan. Oraingo honetan Jerusalemeko palestinarren ibilbide historikoaz eta egungo egoeraz aritu dira. Solasaldian azaldu dutenez, Israelek 1967an Al Quds okupatu zuenetik gaur egunera arte xede argi bat izan du mugimendu sionistak: hiri santua bereganatu eta bertako populazio palestinarra desagertaraztea. Horretarako, hasieran indar militar hutsa baliatu bazuten ere, gaur egun bestelako tresnak garatu dituzte Jerusalemeko geografia eta demografia eraldatzeko; besteak beste; gazteen eta gizarte ekintzaileen atxiloketa masiboak, eraikin palestinarren birrinketak, trikimailu administratiboak bertako palestinarrek hiritartasun estatusa gal dezaten, auzune palestinarrak banatzen dituen harresia, Jerusalemeko historia palestinarra ukatzen duen hezkuntza curriculuma, mugikortasunerako oztopoak... Eta traba horien guztien gainetik Jerusalemeko hiritartasunari eusten dioten palestinarrak ekialdeko auzune getifikatuetan geratu dira isolatuta eta oso baldintza eskasetan bizitzera behartuta daude.

 


Banner

TWITTER KI

 

UHintifada